سڵاو بەرێزم هیوادارم دوور بیت لە بەڵا و نەخۆشی:
بەرێز سەرۆك، دەزانم تۆ تەمەنێكی زۆرت لە شۆرش و پێشمەرگایەتی لە شاخەكانی كوردستان بەرێخستوە، بەڵام ئێستا خەڵكی ئەم وڵاتە بەگشتی ئەو راستیەمان بۆ ئاشكرا بووە، كە تۆ لە شاخیش هەر میر و شا بویتە و خزمەتكار و بەردەست رۆژانە خزمەتیان كردووی. تەنانەت دەگێرنەوە لە شاخیش بینینی تۆ لە لایەن خەڵكی ئاسای و پێشمەرگەی سادەوە گران و ئاستەنگدار بووە. خزمەتكار و بەردەستەكانت دەسەڵات و پێگەیان، نەك هەر لە پێش خەڵك و پێشمەرگەی سادەوە بووە، بگرە لە پێش كادران و هەندێك لە سەركردەكانی شۆرشیشەوە بووە.
ئەمرۆ بۆ زیاتر لە سی ساڵ دەچێت ئێوە فەرمانرەوای ئەم میللەتە لە شارەكانی كوردستان دەكەن. لە هەموو ئەم ماوەیەدا دەزانن چیتان كردوە، یان لانیكەم لە مەودای بینینی خەڵكی ئاسایدا چیتان كردوە. ئەوەی ئێمەی هاوڵاتی دەیبینین، جگە لە كۆكردنەوەی سامان و كڕینی كۆشك و دامەزراندنی كۆمپانیای گەورە و لوشدانی سامان و ماڵ و موڵكی خەڵك زیاتر هیچیتری دیار نیە. شكست هێنان لە سیاسەت و ئیدارە و فەرمانرەوای، دروستكردنی نەهامەتی و بارگرانی زیاتر چیترتان كردوە. منداڵ و نەوەكانتان وەك كورە میر و شازادەكانی دونیا هەڵسوكەوت دەكەن. هەموو منداڵ و هەموو نەوەیەكتان ئێستا خاوەن كۆمپانیا و سامانی زەبەلاحی خۆیەتی. جێگای بردنەسەری پشو و رۆژانی ئاسایان ئۆتێلی پێنج ئەستێرە و مونتەجەعە گرانبەهاكانی ئەوروپا و ئەمریكاییە. ئەمە لە كاتێكدایە قەیران و بێكاری و هەژاری میللەتی بە تەواوەتی ماندو و شەكەت كردوە. بەهۆی سیاسەتی ناتەندروست و خراپ بەرێوەبردنی ئەم وڵاتە و بڵاوبونەوەی گەندەڵی چەند نەوەیەك پێكەوە راپێچی ناو بازنەی قەیرەی و داروخان و شكاندنی شكۆیان دەكەن. تۆ و خێزانەكەتیش هێشتا هەر لاسای شاكانی كەنداو دەكەنەوە.
بەرێزم دەزانیت جیاوازیەكە چیە لە راستیدا لە گەڵ ئەوەی شاكانی كەنداو لە توێژێكی دیكتاتۆری و رەجعی و گەندەڵن، بەڵام میللەتەكەیان لە ژیانێكی شایستە بە مرۆڤدا دەژێنن. رەنگە ئێستا تۆ و دەوروبەرەكەت وەك ئەوەی لە لێدوان و پۆستەكانیان لە سۆشیال میدیا دەردەكەوێت زۆر زویر و نگەران بن، لەوەی بۆچی بەشێكی زۆر لە خەڵكی ئەم وڵاتە دڵخۆشن بە بریارەكەی عێراق لە وەرگرتنەوەی مەلەفی نەوت و گاز لە ئێوە و هەڵوەشاندنەوە گرێبەستیە نەتیەكانی هەرێم، یان هیچ نەبێت نیگەران نین و هیچ هەڵوێستێكیان نیە بۆ بەرگریكردن لە ئێوە.
بەرێزم خەڵكی ئەم وڵاتە چەندین ساڵە لە چاوەروانی ئەوەدان، كە ئێوە رۆژێك ویژدانتان بجوڵێت و بەشێك لە داهاتی ئەو نەوت و گازەی گرێبەستان بۆ كردوە بگەرێننەوە بۆ خەڵك، كەچی بە پێچەوانەوە رۆژانە دەبینن لە سەر داهاتی ئەم وڵاتە ئێوەو منداڵەكانتان سەفای شاهانە دەكەن.
بەرێزم ئەگەر قەیرانی ئابووری هەیە و دۆخەكە نالەبارە، ئەوە پێویستە بۆ هەموو میللەت و ئێوەیش وەك یەك بێت، نەك خەڵكی بسوتێت و ئێوە لە بەهەشتدا بن. ئێوە پێتانوایە ئێستایش سەردەمی خەلیفەكانی ئەمەویە؟، نەخێر گەورەم با كوردستان تا ئەمرۆش ناوچەیەكی دواكەوتوو بێت و هەستی گشتی كۆمەڵگای كوردیش زۆر نزم بێت، بەڵام دڵنیابە خەڵكی زۆر بە باشی دەزانن لە ئەمرۆدا لەم وڵاتە، لە جیهانیش چی دەگوزەرێت، باش دەزانن ئەم فۆرم و مۆدێلەی ئێوە داتانهێناوە هیچ دادپەروەری و مرۆڤدۆستی تیادا نیە و لە هیچ شوێنێكی جیهاندا نمونەی نەماوە، هەر ئەمەیش هۆی راستەقینەی ئەوەیە، كە رۆژانە لاوانی ئەم وڵاتە جنێو بە مێژووی خۆیان و نەفرەت لە شۆرش و خەباتی باوك و باپیرانیان دەكەن.
خەڵكی لە رێگای سۆشیال میدیا و كەناڵە ئاسمانیەكانە سەرۆك و رابەرانی وڵاتانیتر دەبینن چۆن میللەت و وڵاتەكەی خۆیانیان خۆش دەوێت و چۆن رێز لە گەل و نیشتمانەكەیان دەگرن. سەرۆكی كرواتیا كاتێك، كە وڵاتەكەی توشی قەیرانی ئابووری دەبێتەوە، فرۆكە تایبەتەكەی خۆی دەفرۆشێت و دواتریش دەست بۆ فرۆشتنی ئۆتۆمبیلەكانی وەزیر و سەركردە باڵاكانی وڵاتەكەی دەبات، دواتر داوای لە میللەتەكەی كرد، كە پێویستە تەقەشوف بكەن و دان بە خۆیاندا بگرن تا لەو دۆخە ناهەموارەی تێیكەوتون رزگاریان دەبێت. راوێژكاری پێشوی ئەڵمانیا، میركل دوای ئەوەی وڵاتەكەی گەیاندە لوتكەی خۆشگوزەرانی و خاوەن باڵاترین ئابووری ئەوروپا، دوای تەواوبونی ماوەی فەرمانرەوای ماڵئاوای لە دەسەڵات كرد، لەمەیش گرنگتر ئەوەبوو، كاتێك، كە خەڵكی بینیان لەو ماوە دوور و درێژەی فەرمانرەوای ئەو وڵاتە دەوڵەمەندەی كردوە، ئەم سامان و داهاتەكەی هیچ زیادی نەكردوە و گەرایەوە ئەو شوقەیەی پێش بوون بە سەرۆكی تیادا نیشتەجی بوو، چونكە دوای ئەو هەموو ساڵە لە فەرمانرەوای نەیتوانی ببێتە خاوەن خانویەك، كە لە ئاست خانوی بەردەستەكانی بەرێزتانیش بێت. ئەوان بەو سیاسەت و مۆراڵەیان میللەتەكەیان گەیاندوەتە كەناری ئارامی، كەچی ئێوە میللەتی كوردتان كردوەتە مشكی تاقیكردنەوە، هەر رۆژەی سیاسەتێكی لە سەر تاقیدەكەنەوەو كارەساتەكەیش لەوەدایە بەردەوام شكست دەخۆن و باجەكەیشی هەر دەبێت خەڵك بیدات، ئابووری سەربەخۆ و فرۆشتنی نەوت و گازی كوردستان و ریفرانۆم و...هتد. لە فەرهەنگی ئێوەدا میللەت مرۆڤ نیە، مافی ژیانی تەنیا لە خزمەتكردن و چەپڵەڵە لێدانە بۆ ئێوە.
بەرێزم جەنابی سەرۆك خەڵكی لە گەڵ ئەوەدان كوردستان ببێتە خاوەن ئابووری سەربەخۆ، نەك خێزانەكەی بەرێزت ببێتە خاوەن ئابووری سەربەخۆ و میللەتیش باجەكەی بدات. من دەزانم گازی سروشتی چەكێكی زۆر گرنگی ئەم سەردەمەیە، میللەتی وشیار دەزانێت چۆن بەكاری دێنێت و مامەڵەی لە گەڵدا دەكات، بەڵام خەڵكی ئێمە سیاسەتی نەوتی كوردستانییان بینی، لە بری دەستكەوتو خۆشگوزەرانی لەو سیاسەتە، تەنیا نەهامەتی و قەیرانیان دووریەوە. بەڵێ گازی سروشتی هۆیەكی سەرەكی ئەو شەر و پێكدادانیە، كە لەنێوان رووسیا و رۆژئاوادا دروست بووە و جیهانی گەیاندوەتە لێواری شەڕێكی جیهانی، كە بە روودانی دوور نیە كۆتای تەواوی مرۆڤایەتی نەبێت، بەڵام خەڵكی ئێمە ئەوباوەرەیان لایەقین بووە، كە لەم سیاسەتەیشدا تەنیا میللەت باجی شكستكەی ئێوە دەدات و داهات و خۆشیەكانیشی تەنیا بۆ ئێوەیە و پیسی و دەرهاوویشتە خراپەكانیشی بۆ میللەتە.
بەرێزم ئیستا دەزانیت بۆچی كاتێك، كە میركل ماوەی فەرمانرەوای تەواو دەكات، چۆن خەڵكی ئەڵمانیا بەرێیان خست و چی رێز و خۆشەویستیەكیان بۆی دەربری، بەڵام ئێوە هەر یەكەتان بە سوپایەك پاسەوانیشەوە ناتوانن بێنە ناو خەڵكی و رۆژانە خەڵك چیتان پێ دەڵێت؟.
دڵنیابە بەرێزم خەڵكی زۆر بە باشی دەزانێت حكومەتی ناوەند و دەسەڵاتی نوێی عێراق هیچ جیاوازیەكی گەورەیان لە گەل رژێمی بەعسدا نیە، باش دەزانن بەغداد دۆستی میللەتی كورد نیە، باشیش دەزانن ئەم بریارەی دادگای فیدریاڵی دژی میللەتی كوردە، بەڵام ئەو دۆخە قەیراناوی و ژیانە پڕ نەهامەتیەیی ئێوە خوڵقاندوتانە بیر و هۆش و عەقڵی گشتی توشی شڵژان و تێكچون كردوە. جەنابی سەرۆك دەزانیت بۆچی هەموو میللەتانی جیهان لە هەڵگیرسانی شەڕی جیهانی تۆقیون، تەنیا كورد نەبێت، زۆر بێباكانە چاودێری رووداوەكان دەكات وەك ئەوەی خۆی لە هەستاریەكیتر بێت و ئەم شەڕ هیچ كاریگەریەكی لە سەر ئەم نەبێت. بە هەر كەسێك دەڵێت شەڕ رووبدات هەموو مرۆڤایەتی تەواو دەبێت، راستەخۆ پێت دەڵێت، جا چیە ئێمە چیمان لە داگیركەران و شۆرشگێرانی خۆمان، لە دۆست و نەیارەكانمان دووریوەتەوە تا خەم بۆ ئەم ژیانە دۆزەخیە بخۆین. زۆر بە ئەعساب ساردیەوە دەڵێت: ئەم ژیانەی ئێمە چی لە مەرگ زیاتر و باشترە، بۆیە هیوادارم نە لەمن بە هۆی ئەم نامەیەوەو نە لەم میللەتەیش بەهۆی بێباكیان لە بەرگریكردن لە مافی نەتەوەی خۆیان زویر و نیگەران نەبیت، ئەم وتارە و هەڵویستی خەلكیش بە گیانی وەرزشیەوە وەرگرە. ئەگەر بۆت لواو و كرا هەوڵێك بدە بۆ راستكردنەوەی ئەو هەڵە و نارێكیەی بونەتە واقعێك زۆر ئەستەمە تازە چاك بكرێتەوە. تۆ دەتوانیت سەرەتا لە خێزان و ماڵەكەی خۆتەوە دەست پێ بكەیت و دواتر لە هاورێكانتەوە، دڵنیابە ئەو دەم خەڵكیش بە پیر قسە و داواكاریەكانتەوە دێت و وەك سەرۆكێكی گەورە دەتخاتە مێژووی سەروەریەوە.
دووشه مه 22/2/2022